Програма:
- Воведна реч на претседателот на AICA Македонија и информирање околу годишните активности на здружението
- Доделување на наградата „Ладислав Баришиќ“ за истражувачки проект и куса видео презентација
- Промоција на книгата: „Присуство – истражувачки текстови на добитниците на наградата ‘Ладислав Баришиќ’“
- Дискусија „Архивирањето како изведување на критичка пракса“
- Координатор и модератор: Билјана Тануровска Ќулавковски
- Говорници: Зоран Петровски, Слободанка Стевчевска (OПA), Владимир Јанчевски
- Предлози за нови членови на AICA Македонија
- Предлозите се доставуваат најдоцна до 19.11.2025 по електронски пат
- Гласање на 20.11.2025
- Важна напомена: Предлозите за прием на нови членови на AICA Македонија се доставуваат по електронски пат најдоцна до 19 ноември 2025, за да може да се гласа за нив на 20 ноември.
- Промовирање на наградата „Борис Петковски“ и прогласување на првите добитниците во три категории
- Коктел
Оваа година фокусот на симпозиумот е дискусијата „Архивирањето како изведување на критичка пракса“, концепт на Билјана Тануровска Ќулавковски, посветена на архивите и колекциите како простори на нови интерпретации и создавање алтернативни наративи. Дискусијата ќе отвори прашања за тоа како преку уметнички, активистички и кураторски процеси архивите можат да станат места на солидарност, заедничкост и критичка продукција на знаење.
Апстракт:
Дискусијата „Архивирањето како изведување на критичка пракса“ ќе се фокусира на тоа како архивите (вклучувајќи ги и колекциите како музејски архиви) кога се активираат преку уметнички, aртивистички, активистички и кураторски процеси, изведуваат критичка перспектива и воспоставуваат поинакви системи на вредности, солидарност и сеќавање.
Потпирајќи се на согледувањето на кураторот Чарлс Миерведр (Charles Merewether) за архивата како определувачки модерен апарат преку кој се пишува историјата и се воспоставува авторитетот, сесијата ќе истражи како уметничките практики, независните иницијативи и кураторските постапки го потврдуваат или оспоруваат тој авторитет преку реосмислување на архивата како место за создавање нови односи, конвивијални процеси и повторни читања на контекстот, а со тоа и на нејзиното присуство, минато и иднина.
Начините на кој концептите на архивите, како што вели Миерведр биле дефинирани, испитувани, оспорувани и реосмислувани од уметници и културни истражувачи од почетокот на дваесеттиот век до денес, во сферите на уметноста и културната продукција претставуваат места каде се јавуваат некои од најрелевантните прашања за тоа што претставува една архива и каков авторитет таа има во однос на својот предмет на истражување или критичко промислување.
Присуството и отсуството на архивите, продукцијата на знаење преку грижата за делата, практиките и дискурсите – видливи и невидливи – како и нивното поврзување и реисчитување, претставуваат постојан предизвик за критичко преиспитување и кураторската пракса. Кој ги создава и институира архивите, како ги означуваме и колку ги отвораме како места на појавување (Хана Арент) е прашање на кое ќе се осврнеме, дискутирајќи за архивите како простори каде потиснатите истории и гласови повторно се појавуваат и стапуваат во интеракција, и каде преку реактивација и реисчитување се создаваат нови контексти и значења.
Во тој правец, ќе претставиме уметнички и кураторски пристапи како што се архивскu реконструкции, нивни релациски и проблемски исчитувања и поврзувања, итн. – кои покажуваат како архивата може да биде жив, реформирачки и критички простор. Самиот фокус на дискусијата, ќе биде ставен на примери што ќе ги претстават излагачите, преку кои архивата ќе се разгледува како пракса на солидарност, заедничкост, проблемски поврзана пракса, а и форма на отпор, како политички и етички чин, и како чин на спротиставување на институционалниот заборав, и грижа за културната меморија. Односно, каде што се поврзуваат личните заложби со колективното сеќавање, и кои отвораат прашања за создавање на нови етички и политички форми на знаење. Дискусијата исто така, ќе истражи како архивирањето и повторното читање на архивите преку уметнички и кураторски практики може да стане чин на реконфигурирање на архивата во жив екосистем на одговорност, поврзаност и заедничко дејствување.
Учесници во дискусијата се Владимир Јанчевски, Слободанка Стевческа и Зоран Петровски. Дискусијата ќе ја модерира Биљана Тануровска – Ќулавковски.